Lombardia zonë portokalli, lejohen një sërë aktivitetesh sportive dhe tregtare – Alsat

Plani i masave parandaluese për përhapjen e COVID -19 gjatë sezonit të festave në Itali duket se jep frytet e para. Zona e Lombardisë, më e prekura nga humbjet e jetës prej koronavirus, mori frymë sërish këtë të dielë teksa kaloi nga zone e kuqe në atë portokalli.

Dekreti u firmos nga ministri i Shëndetësisë Roberto Speranza, sipas të cilit për 15 ditë një sërë aktivitetesh do jene të lira për qytetarët e këtij rajoni. Por vigjilenca nuk duhet ulur theksoi ai.

“Sfida kundër virusit mbetet ende e pa fituar, por java që lamë pas flet për përmirësim të situatës me sëmundjen. Ky është një rezultat inkurajues që do të thotë se masat e marra gjatë Krishtlindjes kanë funksionuar. Duhet të vazhdojmë të bëjmë kujdes që t’i japim kohë në vijim autoriteteve të fokusohen në fushatën e vaksinimit”, deklaroi ministri.

Shtetrrethimi mbetet në fuqi që do të thotë se nga ora 22 deri në 5 askush nuk mund të dalë nga banesa përveçse emergjencave. Por gjatë ditës hapen baret dhe restorantet pavarësisht se nuk mund të ulesh në ambientet e tyre por porosinë e merr me vete. Shërbimi taksi mbetet funksional përgjatë 24 orëve.

Hapen gjithashtu parukeritë dhe qendrat estetike, madje edhe ato tregtare, përjashto ditët e festave ku krijohen dyndje. Por tregtaret ende kanë ankesa që lidhen kryesisht me të shkuarën.
”Kush gaboi, le të paguaje tani. Vlerësimi fillestar si zonë e kuqe i solli humbje të mëdha bizneseve. Një gabim i pafalshëm dhe katastrofik që vendosi mbylljen me forcë te mijëra aktiviteteve tregtare në kulmin e sezonit të uljeve. Sipas llogaritjeve tona, një javë mbyllje përllogaritet me 600 milionë euro humbje, në rajonin e Lombardisë”, deklaroi Ercole Montanari, kreu i Dhomës së Tregtisë.

Me vlerësimin e gabuar ai i referohet vendimit të qeverise me datë 16 janar që e rivlerësoi rajonin si zonë të rrezikut të lartë. Në shenje proteste, një grup sipërmarrësish mbanin me vete produkte të prishura, teksa bllokuan hyrjen e Bashkisë.

Lajmi më i mirë padyshim lidhet me shkollat. Janë 200 mijë nxënës në Lombardi që i përkasin sistemit 9- vjeçar të cilët rikthehen në bankat e shkollës, 360 mijë të tjerë në Liguria, Marke dhe UMBRIA. 400 mijë të tjerë që i përkasin shkollave të mesme pritet të rifillojnë brenda javës.

Lëvizja mes rajoneve mbetet ndërkohë e ndaluar deri më 15 shkurt, por çdo qytetari te zonës i lejohet një vizitë në ditë tek të afërmit dhe lëvizja drejt shtëpive të pushimit.

 

The post Lombardia zonë portokalli, lejohen një sërë aktivitetesh sportive dhe tregtare appeared first on Alsat.

LEXO EDHE:

Back to top button